《觸犯歧視條例》
年前係阿根廷做全職師奶的我，每日都會去學西文同買餸。其實去超市買餸就好似香港派$4000柑艱難, 因為要有心理準備會俾啲阿根貴婦用佢哋嘅掃描電動眼由頭到腳掃我一次。就好似申請$4000要你交曬所有文件，掃你既家底一次…
🙄例如去鮮肉檔啲職員會問我點解唔去急凍櫃買肉，因為佢哋覺得我買唔起。
🙄又例如去到收銀處，一個委內瑞拉藉女收銀同每一個本地客人打招呼講早晨，輪到我喇，心裡暗暗期待收銀姐姐都會同我講早晨，點知佢冇，連我主動同佢講早晨，佢都無動於衷。
阿根廷貧富懸殊，一街之隔嘅貧民窟絕對慎入，反之喺有錢人區同呢班意大利或西班牙後裔認為自己是高高在上的歐洲上等人共處一街呢？上等人拖住佢哋染滿粉紅毛嘅貴婦狗周街疴屎時，我偶爾都會同狗狗打招呼，而上等主人會拉開隻狗因驚我句”Hola”會整污穢佢隻狗🙄。
最諷刺嘅係，懶理你飽讀詩書滿口雞腸，總之你唔識講西班牙文=冇受教育的人。可能去過阿根廷旅行嘅亞洲人唔認同我，但記住路過一個國家，同活在一個國家，絕對係兩回事。
當我面對 嗰度又唔去得，呢度又不容我，係街上都俾人覺得我阻街時，簡直俾死更難受。嗰刻我想有一張哈利波特隱形毯，可能啲人見唔到我，阿根廷人嘅嘅世界會更美麗。
每個人嘅知識上限唔同，
每個人嘅長短處亦有所不同。
當你睇低別人嘅同時，問問自己是否已成為一個完美無缺的人？到底我喺你哋嘅世界顯得咁愚昧？還是你哋愚昧得連喺呢個世界上有一個為愛勇闖天涯海角，呢一站降臨於南美洲，下一站降臨非洲嘅黃皮膚小女子也容不下？
“挫折會粉碎 拼湊了字句
唱進了心裡 似暖的火堆
叫喊 別怕做我活到不屈便對”
感恩所經歷過的都教曉我長大，所謂的委屈，人家只是喺自己生活中路過而已，屬冰山一角，忟過慶過發洩過就算了。其實別人冷眼又洗乜驚喎，唔好望人咪得囉🤪
為愛而東奔西跑，慶幸愛情跑道上總有身後呢個成日嬲嬲豬樣不過內心充滿愛嘅男人😆
#別小看我
#歧視
#路過不同活過
#嫁到意大利偏偏唔喺意大利
Search